Exo 24 | CopSahBible2 | STEP | ⲡⲉϫⲁϥ ⲇⲉ ⲛϭⲓ ⲡϫⲟⲉⲓⲥ ⲙⲙⲱⲩⲥⲏⲥ ϫⲉ ⲁⲙⲟⲩ ⲉϩⲣⲁⲓ ϣⲁ ⲡϫⲟⲉⲓⲥ ⲛⲧⲟⲕ ⲁⲩⲱ ⲁⲁⲣⲱⲛ ⲙⲛ ⲁⲇⲁⲃ ⲙⲛ ⲁⲃⲓⲟⲩⲇ ⲁⲩⲱ ϣϥⲉ ⲉⲃⲟⲗ ϩⲛ ⲛⲉⲡⲣⲉⲥⲃⲩⲧⲉⲣⲟⲥ ⲙⲡ ⲓ︤ⲏ︦ⲗ︥ ⲛⲥⲉⲟⲩⲱϣⲧ ⲙⲡϫⲟⲉⲓⲥ ⲙⲡⲟⲩⲉ

Exodus 24

1 ⲡⲉϫⲁϥ ⲇⲉ ⲛϭⲓ ⲡϫⲟⲉⲓⲥ ⲙⲙⲱⲩⲥⲏⲥ ϫⲉ ⲁⲙⲟⲩ ⲉϩⲣⲁⲓ ϣⲁ ⲡϫⲟⲉⲓⲥ ⲛⲧⲟⲕ ⲁⲩⲱ ⲁⲁⲣⲱⲛ ⲙⲛ ⲁⲇⲁⲃ ⲙⲛ ⲁⲃⲓⲟⲩⲇ ⲁⲩⲱ ϣϥⲉ ⲉⲃⲟⲗ ϩⲛ ⲛⲉⲡⲣⲉⲥⲃⲩⲧⲉⲣⲟⲥ ⲙⲡⲓ︤ⲏ︦ⲗ︥ ⲛⲥⲉⲟⲩⲱϣⲧ ⲙⲡϫⲟⲉⲓⲥ ⲙⲡⲟⲩⲉ 2 ⲛϥϩⲱⲛ ⲉϩⲟⲩⲛ ⲙⲁⲩⲁⲁϥ ⲛϭⲓ ⲙⲱⲩⲥⲏⲥ ⲉⲡⲛⲟⲩⲧⲉ ⲛⲧⲟⲟⲩ ⲇⲉ ⲛⲛⲉⲩϩⲱⲛ ⲉϩⲟⲩⲛ ⲡⲗⲁⲟⲥ ⲇⲉ ⲛⲛⲉϥⲉⲓ ⲉϩⲣⲁⲓ ⲛⲙⲙⲁⲩ 3 ⲁϥⲃⲱⲕ ⲇⲉ ⲉϩⲟⲩⲛ ⲛϭⲓ ⲙⲱⲩⲥⲏⲥ ⲁϥϫⲱ ⲛⲛⲁϩⲣⲙ ⲡⲗⲁⲟⲥ ⲛⲛϣⲁϫⲉ ⲧⲏⲣⲟⲩ ⲙⲡⲛⲟⲩⲧⲉ ⲙⲛ ⲛⲉϥⲇⲓⲕⲁⲓⲱⲙⲁ ⲁϥⲟⲩⲱϣⲃ ⲇⲉ ⲛϭⲓ ⲡⲗⲁⲟⲥ ⲧⲏⲣϥ ϩⲛ ⲟⲩⲥⲙⲏ ⲛⲟⲩⲱⲧ ⲉⲩϫⲱ ⲙⲙⲟⲥ ϫⲉ ⲛϣⲁϫⲉ ⲧⲏⲣⲟⲩ ⲉⲛⲧⲁⲡϫⲟⲉⲓⲥ ϫⲟⲟⲩ ⲧⲛⲛⲁⲁⲩ ⲁⲩⲱ ⲛⲧⲛⲥⲱⲧⲙ ⲉⲣⲟⲟⲩ 4 ⲁϥⲥϩⲁⲓ ⲇⲉ ⲛϭⲓ ⲙⲱⲩⲥⲏⲥ ⲛⲛϣⲁϫⲉ ⲧⲏⲣⲟⲩ ⲙⲡϫⲟⲓⲥ ⲁϥϣⲟⲣⲡϥ ⲇⲉ ⲛϭⲓ ⲙⲱⲩⲥⲏⲥ ⲉϩⲧⲟⲟⲩⲉ ⲁϥⲕⲱⲧ ⲛⲟⲩⲑⲩⲥⲓⲁⲥⲧⲏⲣⲓⲟⲛ ϩⲁⲣⲁⲧϥ ⲙⲡⲧⲟⲟⲩ ⲁⲩⲱ ⲙⲛⲧⲥⲛⲟⲟⲩⲥ ⲛⲱⲛⲉ ⲉⲧⲙⲛⲧⲥⲛⲟⲟⲩⲥ ⲙⲫⲩⲗⲏ ⲙⲡⲓ︤ⲏ︦ⲗ︥ 5 ⲁⲩⲱ ⲁϥϫⲟⲟⲩ ⲛⲛϩⲣϣⲓⲣⲉ ⲛⲛϣⲏⲣⲉ ⲙⲡⲓ︤ⲏ︦ⲗ︥ ⲁⲩⲧⲁⲗⲟ ⲉϩⲣⲁⲓ ⲛϩⲉⲛϭⲗⲓⲗ ⲁⲩⲱ ⲁⲩϣⲱⲱⲧ ⲛϩⲉⲛⲙⲁⲥⲉ ⲛⲑⲩⲥⲓⲁ ⲛⲟⲩϫⲁⲓ ⲙⲡⲛⲟⲩⲧⲉ 6 ⲁϥϫⲓ ⲇⲉ ⲛϭⲓ ⲙⲱⲩⲥⲏⲥ ⲛⲧⲡⲁϣⲉ ⲙⲡⲉⲥⲛⲟϥ ⲁϥⲡⲱϩⲧ ⲙⲙⲟϥ ⲉϩⲉⲛϩⲛⲁⲁⲩ ⲁⲩⲱ ⲧⲕⲉⲡⲁϣⲉ ⲙⲡⲉⲥⲛⲟϥ ⲁϥⲡⲱϩⲧ ⲙⲙⲟϥ ϩⲁⲣⲁⲧϥ ⲙⲡⲉⲑⲩⲥⲓⲁⲥⲧⲏⲣⲓⲟⲛ 7 ⲁⲩⲱ ⲁϥϫⲓ ⲙⲡϫⲱⲱⲙⲉ ⲛⲧⲇⲓⲁⲑⲏⲕⲏ ⲁϥⲱϣ ⲙⲛⲟϥ ⲉⲙⲙⲁⲁϫⲉ ⲙⲡⲗⲁⲟⲥ ⲁⲩⲱ ⲁⲩⲟⲩⲱϣⲃ ϫⲉ ϩⲱⲃ ⲛⲓⲙ ⲉⲛⲧⲁⲡϫⲟⲉⲓⲥ ϫⲟⲟⲩ ⲧⲛⲛⲁⲁⲩ ⲁⲩⲱ ⲛⲧⲛⲥⲱⲧⲙ ⲉⲣⲟⲟⲩ 8 ⲁϥϫⲓ ⲇⲉ ⲛϭⲓ ⲙⲱⲩⲥⲏⲥ ⲙⲡⲉⲥⲛⲟϥ ⲁϥϭⲟϣϭⲉϣ ⲙⲙⲟϥ ⲉⲃⲟⲗ ϩⲓϫⲙ ⲡⲗⲁⲟⲥ ⲁⲩⲱ ⲡⲉϫⲁϥ ϫⲉ ⲡⲁⲓ ⲡⲉ ⲡⲉⲥⲛⲟϥ ⲛⲧⲇⲓⲁⲑⲏⲕⲏ ⲉⲛⲧⲁⲡⲛⲟⲩⲧⲉ ⲥⲙⲛⲧⲥ ⲛⲙⲙⲏⲧⲛ ⲉⲧⲃⲉ ⲛⲉⲓϣⲁϫⲉ ⲧⲏⲣⲟⲩ 9 ⲁϥⲃⲱⲕ ⲇⲉ ⲉϩⲣⲁⲓ ⲛϭⲓ ⲙⲱⲩⲥⲏⲥ ⲙⲛ ⲁⲁⲣⲱⲛ ⲙⲛ ⲁⲇⲁⲃ ⲙⲛ ⲁⲃⲓⲟⲩⲇ ⲁⲩⲱ ϣϥⲉ ⲉⲃⲟⲗ ϩⲛ ⲛϩⲗⲗⲟⲓ ⲙⲡⲓ︤ⲏ︦ⲗ︥ 10 ⲁⲩⲱ ⲁⲩⲛⲁⲩ ⲉⲡⲙⲁ ⲉⲧⲉⲣⲉⲡⲛⲟⲩⲧⲉ ⲙⲡⲓ︤ⲏ︦ⲗ︥ ⲁϩⲉⲣⲁⲧϥ ⲛϩⲏⲧϥ ⲁⲩⲱ ⲡⲙⲁ ⲉⲧϩⲁⲛⲉϥⲟⲩⲉⲣⲏⲧⲉ ⲉϥⲟ ⲛⲑⲉ ⲛⲟⲩϩⲱⲃ ⲛⲧⲱⲃⲉ ⲛⲥⲁⲡⲡⲓⲣⲟⲛ ⲁⲩⲱ ⲛⲑⲉ ⲙⲡⲉⲓⲛⲉ ⲙⲡⲉⲥⲧⲉⲣⲉⲱⲙⲁ ⲛⲧⲡⲉ ϩⲙ ⲡⲉϥⲟⲩⲟⲡ 11 ⲁⲩⲱ ⲙⲡⲉⲗⲁⲁⲩ ϯ ⲛⲧⲉϥⲥⲙⲏ ⲉⲃⲟⲗ ϩⲛ ⲛⲥⲱⲧⲡ ⲙⲡⲓ︤ⲏ︦ⲗ︥ ⲁⲩⲱ ⲁⲩⲟⲩⲱⲛϩ ⲉⲃⲟⲗ ϩⲙ ⲡⲙⲁ ⲙⲡⲛⲟⲩⲧⲉ ⲁⲩⲟⲩⲱⲙ ⲁⲩⲱ ⲁⲩⲥⲱ 12 ⲡⲉϫⲁϥ ⲇⲉ ⲛϭⲓ ⲡϫⲟⲉⲓⲥ ⲙⲙⲱⲩⲥⲏⲥ ϫⲉ ⲁⲙⲟⲩ ⲉϩⲣⲁⲓ ϣⲁⲣⲟⲓ ⲉⲡⲧⲟⲟⲩ ⲛⲅϣⲱⲡⲉ ϩⲙ ⲡⲙⲁ ⲉⲧⲙⲙⲁⲩ ⲧⲁϯ ⲛⲁⲕ ⲛϩⲉⲛⲡⲩⲝⲓⲟⲛ ⲛⲱⲛⲉ ⲡⲛⲟⲙⲟⲥ ⲙⲛ ⲛⲉⲛⲧⲟⲗⲏ ⲉⲛⲧⲁⲓⲥϩⲁⲓⲥⲟⲩ ⲉⲥⲙⲛⲧⲟⲩ ⲛⲁⲕ 13 ⲁϥⲧⲱⲟⲩⲛ ⲇⲉ ⲛϭⲓ ⲙⲱⲩⲥⲏⲥ ⲙⲛ ⲓⲏⲥⲟⲩⲥ ⲡⲉⲧⲁϩⲉⲣⲁⲧϥ ⲉⲣⲟϥ ⲁⲩⲃⲱⲕ ⲉϩⲣⲁⲓ ⲉⲡⲧⲟⲟⲩ ⲙⲡⲛⲟⲩⲧⲉ 14 ⲁⲩⲱ ⲡⲉϫⲁⲩ ⲛⲛⲉⲡⲣⲉⲥⲃⲩⲧⲉⲣⲟⲥ ϫⲉ ϭⲱ ⲛⲏⲧⲛ ⲙⲡⲉⲓⲙⲁ ϣⲁⲛⲧⲛⲕⲟⲧⲛ ϣⲁⲣⲱⲧⲛ ⲁⲩⲱ ⲉⲓⲥ ϩⲏⲏⲧⲉ ⲉⲓⲥ ⲁⲁⲣⲱⲛ ⲙⲛ ⲱⲣ ⲛⲙⲙⲏⲧⲛ ⲉϣⲱⲡⲉ ⲟⲩⲛⲧⲉⲟⲩⲁ ⲟⲩϩⲁⲡ ⲙⲁⲣⲟⲩⲃⲱⲕ ⲉⲣⲁⲧⲟⲩ 15 ⲙⲱⲩⲥⲏⲥ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲧⲟⲟⲩ ⲁⲩⲱ ⲧⲉⲕⲗⲟⲟⲗⲉ ⲁⲥϩⲱⲃⲥ ⲙⲡⲧⲟⲟⲩ 16 ⲁϥⲉⲓ ⲉⲡⲉⲥⲏⲧ ⲛϭⲓ ⲡⲉⲟⲟⲩ ⲙⲡⲛⲟⲩⲧⲉ ⲉϩⲣⲁⲓ ⲉϫⲙ ⲡⲧⲟⲟⲩ ⲛⲥⲓⲛⲁ ⲧⲉⲕⲗⲟⲟⲗⲉ ⲇⲉ ⲁⲥϩⲱⲃⲥ ⲙⲙⲟϥ ⲛⲥⲟⲟⲩ ⲛϩⲟⲟⲩ ⲡϫⲟⲉⲓⲥ ⲇⲉ ⲁϥⲙⲟⲩⲧⲉ ⲉⲙⲱⲩⲥⲏⲥ ϩⲙ ⲡⲙⲉϩⲥⲁϣϥ ⲛϩⲟⲟⲩ ⲉⲃⲟⲗ ϩⲛ ⲧⲉⲕⲗⲟⲟⲗⲉ 17 ⲡⲉⲓⲛⲉ ⲇⲉ ⲙⲡⲉⲟⲟⲩ ⲙⲡϫⲟⲉⲓⲥ ⲛⲉϥⲟ ⲛⲑⲉ ⲛⲟⲩⲕⲱϩⲧ ⲉϥϯϣⲁϩ ϩⲣⲁⲓ ϩⲓϫⲙ ⲧⲁⲡⲉ ⲙⲡⲧⲟⲟⲩ ⲙⲡⲉⲙⲧⲟ ⲉⲃⲟⲗ ⲛⲛϣⲏⲣⲉ ⲙⲡⲓ︤ⲏ︦ⲗ︥ 18 ⲙⲱⲩⲥⲏⲥ ⲇⲉ ⲁϥⲃⲱⲕ ⲉϩⲟⲩⲛ ⲉⲧⲙⲏⲧⲉ ⲛⲧⲉⲕⲗⲟⲟⲗⲉ ⲁⲩⲱ ⲁϥⲁⲗⲉ ⲉϩⲣⲁⲓ ⲉϫⲙ ⲡⲧⲟⲟⲩ ⲛⲉϥϣⲟⲟⲡ ⲇⲉ ⲙⲙⲁⲩ ϩⲣⲁⲓ ϩⲓϫⲙ ⲡⲧⲟⲟⲩ ⲛϩⲙⲉ ⲛϩⲟⲟⲩ ⲙⲛ ϩⲙⲉ ⲛⲟⲩϣⲏ